عن الهيافة وأحكامها
يمكنكم الآن متابعة آخر الأخبار مجاناً من خلال حسابنا على تويتر
إضغط هنا للإشتراك
قال الناس زمان عن الهايف أنه أللى ييجى فى الهايفه و يتصدر.
فكرت في من تنطبق عليهم هذه المقولة فاستعرضت أعمال الحكومه ومجلس الشعب الذي يجتمع ويلبس أفراده كرافاتاتهم وجلاليبهم ويتركوا أولادهم وزوجاتهم ليذهبوا الي مجلسهم العامر لمناقشة موضوع خطير كموضوع الفنانة نجلاء وحصانها الذي أشتهر أكثر من حصان طرواده...أو روبي وعجلتها المثيره....أو وزير الثقافه الذي جن حين تكلم عن الحجاب فتم محاسبته حساب المفسدين في الأرض...وناهيك عن عصام الحضري ومشكلته الرهيبة وكيف تجرأ الفرنجه وجعلوا زوجته تخلع حجابها...
وغيرها من المشاكل الكبيرة التي تشملل أعضاء حكومتنا ومجالسنا المحترمين وعالجوها بجرأه قبل أن تنشر الفساد في مجتمعنا الأمن وقبل أن يغضب الله علي مصر وشعبها فيحرقهما بنار وكبريت فهو واجبهم حماية مصر.
أما عن رغيف العيش الذي مات لأجله العشرات والذي يقف علي طوابيره جميع الغلابه بالساعات فهو ليس من أختصاصهم.... فهو خطأ الناس اللي مابتشبعش وما بتبطلش خلفه. والناس المطحونين اللي كل واحد فيهم بيشتغل شغلتين وأكثر علشان يقدر يعيش علي الكفاف لو عاش...ده مش شغلهم.مين قاله يتجوز !؟ فلو فضل عاذب كان فضل عايش علي حساب أبوه... أما أبوه فيتحرق دمه ويموت بدري من غلبه ونخلص منه.والناس التعبانيين ممكن يتزمروا أو لاقدر الله يثوروا وأحنا مش ناسيين سبارتاكوس وثورة العبيد. يبقي الحل أيه ؟ أه...نشغلهم بمدارس مافيهاش تعليم ودروس خصوصيه تخلي الشريف يسرق والعاقل يتجنن.... والأب اللي مايقدرش يدفع يبقي مقصر في حق بيته.ومايقدرش يرفع عينه في وش مراته ولا عياله... نشغلهم بأيه تاني ؟؟؟؟ ماحنا حكومتنا و مجالسنا أذكياء بيجيبوا الأفكار اللي ماتخطرش علي بال حد.
ممكن نعملهم مشكلة في الميه أو الزيت أو البنزين أو نستعمل البنزين بطريقه تانيه ونولع الدنيا بين المسلمين والمسيحيين... وديه أكثر حاجه ممكن نلهي بيها الناس فالدين قدامه الواحد بينسي نفسه وينسي كل مشاكلة و الطريقة سهلة... المسحيين دول غلابه مابيفتحوش بقهم فنسيب أيدنا شويه عن المسلمين المتطرفين وما أكثرهم وهما عليهم الباقي. ماهما مابيتوصوش وبالذات مادام الحكايه فيها أقباط...أو نزود الهيافه شويه ونعملهم مشكله علي سور دير في الصحرا اصل الصحرا مليانه رمل وتراب مصر مايتقدرش بتمن... ولو وافقنا علي السور فمايزيدش أرتفاعه عن متر ونصف أصل المحافظ وأولاده وأحفاده لما بيعوزوا يخرجوا يتمشوا في الصحراء السور العالي بيمنع عنهم الهوا ورؤية طيور السما والواد الصغير ما يعرفش يتشعبط عليه لوعلي عن متر ونصف... بس الأقباط ممكن يصرخوا من الظلم والملاعين أقباط المهجر صوتهم عالي وأحنا مش طايلنهم... بس مش مهم.. القبطي يصرخ فيبقي عايز يعمل فتنه طائفيه وجزاؤه عند الحكومة كبير وجاهز...
وبتوع المهجر دول يبقوا خونه وبيستعينوا بالخارج... أصل أحنا حكومتنا عندها لكل مشكله حل واللي ماتلاقيش معاه حل يبقي مجنون ومختل عقلياً. ومجلسنا الموقر أوي اللي مايتصدرش ألا في الهايفه.شاطر في التسقيف وكل اللي تقوله الحكومه أوامر واللي يقوله الريس وأبنه ( أقصد الريس الحالي واللي جاي ) أوامر ونعملها ولو علي رقبتنا أصل أحنا بنفهم في الأصول ومنخالفش الكبير أبداً.
وقولة لأ حرام تودي في داهيه وتبعد عن المجلس..اًخخخخخخ ولو بعدنا عنه أمال ننام فين ؟؟في بيوتنا يعني !!! والشعب المفتري ده عاوز أيه أكثر من رضا سيده.
ربنا يخلي لينا حكومتنا الفتيه ومجالسنا البهيه ورجالتنا المحترمين وقولوا علي مصر السلام.... والسلام ختام.
بهاء رمزي
هولندا
التعليقات
مصر المحبة
رعد الحافظ -اكبر مشكلتين في مصر حاليا باعتقادي هما الزيادة السكانية الكبيرة التي لا تترك فرص كبيرة للتقدم مع محدودية الموارد للبلد..والثانية هو التعصب الديني في السنوات الاخيرة. اما احتكار السلطة فتاثيرها اقل من العاملين الاولين لان القادمين ايضا من نفس الشعب المصري الطيب وسيعانون نفس المشاكل اذا استمرت الزيادة السكانية والتعصب.انا اعتقد ان الشعب المصري من اكثر الشعوب العربية طيبة ومحبة واريحية وتسامح على مر التاريخ وما نراه الان سحابة صيف ستمر سريعا بذكاء الشعب المصري وتلاحم ابناءه الطيبين
تجاهل
مصرى -ال1ى يتجاهل المشكله السكانيه فى مصر كمن يدفن راسه فى الرماد ..وللأسف الشديد لا أحد يستطيع ان يقف فى وجه الزياده السكانيه لان المؤسسه الدينيه الإسلاميه تقف فى وجه اى حلول
المحافظ و التنميه
c -محافظ المنيا ساب شغله و التنميه في المحافظه و ماسك في السور و محامي السور اللي تطاول علي الباشا .. فيه نقطه اساسيه ارجو ان يتنبه لها الرهبان هل ارتفاع السور متر و نصف لأسفل او لأعلي ؟؟؟ يعني ارتفاع ناحيه السما ؟؟ و الا اعتبار من سطح الارض و انت نازل ؟؟؟