صديقى الماليزى يرفض رئاسة مصر!!
يمكنكم الآن متابعة آخر الأخبار مجاناً من خلال حسابنا على تويتر
إضغط هنا للإشتراك
لى صديق عزيز فى بلاد الفرنجة التى أعيش فيها وهو ماليزى مسلم ولكنه فى نفس الوقت "متأمرك" زى حالاتى، وأخبرنى أن كلمة "متأمرك" ليست تهمة فى ماليزيا، وتربطنى به علاقة عمل وتحولت مع الوقت إلى صداقة، ودائما ما نتناول طعام الغذاء سويا مرة فى الأسبوع، وفى آخر جلسة غذاء بدأت الحديث بيننا كالتالى:
- إنت مش دايما بتقوللى نفسك تزور مصر؟
- أيوه بشرط تيجى معايا وبعدين نطلع على ماليزيا بعد كده.
- موافق، بس أنا عندى لك عرض هايل مش يخليك بس تزور مصر، لكن كمان تستقر فى مصر.
- تقصد إيه؟
- عندى لك شغلانة هايلة فى مصر، والحقيقة هى أهم شغلانة فى مصر.
- إيه ياترى إنت أكيد بتهزر ؟
- إيه رأيك نخليك رئيس جمهورية؟
فصمت وتأمل فى وجهى لكى يتيقن أننى بكامل قواى العقلية وأننى "لست مختل عقليا"!!
- إنت بتقول إيه إنت "إتجننت" يعنى إيه عاوزنى أبقى رئيس على مصر، وإزاى واحد من ماليزيا زيي يبقى رئيس على مصر؟
- أنت مش مسلم؟
- أيوه.
- يبقى خلاص مش مهم، دلوقت طالعة موجة جديدة فى مصر إننا نجيب رئيس "أجنبى" بشرط يكون مسلم.
- يعنى إيه تجيبوا رئيس أجنبى؟
- يعنى زى ما بنجيب حكام ومدربين أجانب لكرة القدم، إيه المانع أننا نجيب رئيس جمهورية أجنبى.
- يعنى عاوز تقوللى إننى ممكن أكون "مستر بريزيدنت" بتاع مصر؟
- أيوه إيه رأيك بقى؟
- دى حاجة عظيمة جدا، بس أنا بأعرفش عربى.
- مش مهم... تتعلم، محمد على باشا ما كانش يعرف عربى وإتعلم وهو عنده ييجى أربعين سنة.
- مين محمد على باشا ده؟
- آه صحيح ده إنت ما تعرفش تاريخ مصر.
- ودى مشكلة كبيرة بالنسبة لى، أنا ما أعرفش أى حاجة عن مصر إلا الأهرامات وبعض الآثار إللى بأشوفها فى التليفزيون.
- كل حاجة ممكن تتعلمها بسهولة.
- طيب وإنتو الدستور بتاعكم بيسمح إن الرئيس يكون أجنبى ؟
- لأ ياسيدى ده بيشترط إن الرئيس يكون مصرى أبا عن جد.
- طيب رئيس أجنبى ده ما يكونش مخالف لدستوركم؟
- دستور يأسيادنا، وبعدين إحنا الدستور بتاعنا "فول سايز" يعنى على كل "لون يابطستة".
- بتقول إيه ؟بطستة إيه وفول سايز ؟
- ده أنت حكايتك حكاية، اللغة وممكن تتعلمها لكن حنعلمك النكتة المصرية إزاى؟
- أنا مش فاهم حاجة خالص، إيه علاقة النكت بنظام الحكم ؟
- ما هو حاكم مصر، لو مش إبن بلد ومفتح وبتاع نكتة، يبقى مش حينفع.
- مفتح إيه، ما أنا مفتح قدامك أهو.. هو أنا أعمى، وإيه موضوع إبن نكتة ده، هو حيحكم بلد ولا حيشتغل فى سيرك!!
- سيبك من الكلام ده كله دلوقت، دلوقت فيه فى مصر نغمة جديدة أو موضة جديدة طالعة إن ما فيش مانع يحكمنا حاكم من ماليزيا مادام مسلم، وأنا وجدت إن كل الشروط تنطبق عليك.
- وتفتكر حيدفعوا لى كام ؟
- الحقيقة أنا ماأعرفش الرئيس بياخد كام دلوقتى، بس مش حيزيد عن 20 ألف جنيه فى الشهر.
- و20 ألف جنيه يطلعوا كام دولار؟
- ده إنت ما عندكش فكرة عن الفاصوليا.
- فاصوليا إيه، خلينا نتكلم فى المرتب.
- دول ياسيدى حوالى 3500 دولار فى الشهر
- بتقول إيه 3500 دولار يعملوا إيه، ده أنا دخلى هنا وإنت عارف أكثر من عشرة آلاف دولار فى الشهر، عاوزنى أروح أشتغل فى مصر بثلث المبلغ ده؟
- ما هو الريس ممكن يشتغل شغلانة تانية بعد الظهر يكسب منها أضعاف مرتبه.
- ريس إيه إللى يشتغل بعد الظهر، الريس ده مفروض بيشتغل 24 ساعة فى اليوم، يعنى مش فاضى يهرش!!
- جبتها منين "مش فاضى يهرش" دى حاجة مصرى خالص، لأ أنا كده إطمأنيت عليك، الرئيس بيعمل فلوس تانية من أعمال خارجية، يعنى ممكن يدى دروس خصوصية بعد الظهر، والدروس الخصوصية دى بتكسب جامد جدا، وكمان ما عليهاش ضرايب.
- رئيس إيه إللى يدى دروس خصوصية ده؟؟
فقلت له وغمزت له بعينى مع حركة من الشفة السفلى (حركة مصرية مشهورة معناها كده وكده يعنى)
- يعنى بيدى دروس خصوصية كده وكده يعنى
- كده وكده يعنى إيه، ومالك عمال تغمزنى بعينك إنت عندك رمد فى عينك.
- ده إنت مش فاهم حاجة خالص، على العموم من ناحية الفلوس إنت ما تقلقش، الرؤساء بتوعنا أولا ضامنين وظائفهم مدى الحياة زى قضاة المحكمة الدستورية العليا فى أمريكا، وبعدين لما الواحد منهم يموت بنكتشف إنه ترك ثروة بالملايين لأولاده من تحويش مرتبه.
- ملايين إيه من المرتب التعبان ده
- أصل فلوسهم كلها مبروكة، قلت إيه يا حلو.
- قلت يفتح الله.
- وكمان عرفت يفتح الله
- لا ياعم دى شغلانة تقصر العمر، أنا هنا مبسوط على الآخر، بأشكرك على الوظيفة لكن الشغلانة مش مناسبة لى ودخلها ضعيف جدا
- والله عال رضينا بالماليزى، والماليزى مش راضى بينا!!