مطلوب زوجة (مسيار): الدفع مقدما

من أفضال الله علىّ أن زوجتى لا تقرأ مقالاتى، ولها فى هذا حجج كثيرة، منها أنها تفضل القراءة باللغة الإنجليزية، ثانيا أن مقالاتى تعرض المشاكل ولا تعرض الحلول، ثالثا أن مقالاتى دمها تقيل، ورابعا أن ماعندهاش وقت للقراءة حيث أن وقتها موزع ما بين عملها وشغل البيت والإهتمام بالبنات، المهم أننى حمدت الله على هذا، وهذا أعطانى مجالا إلى أن آخد راحتى عند كتابة أى مقال، وهذا المقال بالذات أرجو ألا تعثرفيهزوجتى، كما أرجو من أصدقائى وأقاربى والذين يعرفون عنوان البريد الإلكترونى لزوجتى ألا يحاولوا أن يعملوا فىّ مقلب بإرسال هذا المقال إلى زوجتى.
وقد أضطرتنى الظروف الإقتصادية الأخيرة إلى أن أترك زوجتى وأسرتى للعمل فى مكان آخر، ومنذ أن أنتقلت إلى مكان عملى الجديد وجدتنى أشعر بوحشة ووحدة شديدة، وسمعت كثيرا عن أن هناك نوادى للتعارف، ولكنى إستبعدت الذهاب إلى مثل تلك النوادى، وكذلك عرفت عن طريق الإنترنت عشرات المواقع للتعارف، ولكنى وجدت أن أفضل شئ هو أن أتزوج زواجا حلالا خلال الفترة التى أبتعد فيها عن زوجتى، ولم أقرر بعد إذا كنت سوف آخذ رأى زوجتى فى هذا القرار التاريخى والإستراتيجى أم لا؟ وقلت خلينا الأول نجد الزوجة المؤقتة وبعدها يحلها حلاّل، وسمعت عن عدة أنواع من الزيجات المؤقتة والتى يوافق عليها بعض الفقهاء، مثل زواج المتعة وإستبعدت هذا الزواج لأنه منتشر أكثر بين الشيعة وأنا لست شيعيا، لذلك بقى نوعين من الزواجات: زواج المسيار، والزواج الآخر هو ما يقال له زواج على أبوها، ولكى أعرف الفرق وجدت إعلانا فى إحدى المواقع العربية ويسأل الإعلان صراحة: هل ترغب فى زوجة مسيار إتصل بنا على التليفون *****
ووجدتنى مدفوعا بحب الإستطلاع الغريزى وبتأثير شعور الوحدة أتصل بالتليفون، وإكتشفت أن المكالمة سوف يتم تحصيل قيمتها من تليفونى ويتم الحساب بالدقيقة، وقلت لنفسى مش مهم نصرف كام دولار، لأننى أبحث عن زوجة ولا أشترى فرخة، فالموضوع يستاهل التضحية رغم الأزمة المالية العالمية. ودار بينى وبين شخص ما هذا الحوار التليفونى:
- مساء الخير، معاك سامى
- أهلا مساء الخير، معاك "قرنى أبو ثور"من شركة "مسياركو للزواجات السريعة"
- كنت قريت إعلان عن زواج المسيار وزواج على أبوها عن طريق شركتكم، شركة مسياركو
- أيوه ده الإعلان بتاعنا، إنت عارف طبعا إننا بنسجل المكالمات وذلك لأمور قانونية وأيضا سوف تكلفك المكالمة دولار ونصف للدقيقة الواحدة، فهل توافق
- أوافق بس لو سمحت ممكن تتكلم بسرعة شوية
- طلباتك إيه؟
- أولا عاوز أعرف إيه الفرق بين زواج المسيار وزواج على أبوها؟
- زواج المسيار إنت بتتجوز واحدة ويكون عندها بيت ومستقلة بنفسها أو إنك بتفرش لها بيت وكل ما تحب تعدى عليها، تعدى عليها تبات معاها ليلة أو ليلتين أو أى عدد من الليالى زى ماإنت عاوز وبعدين تسيبها وترجع لبيتك وولادك.
- طيب وزواج على أبوها؟
- زواج على أبوها، إن البنت ما تسيبش بيت أبوها، وإنت تعدى عليها كل كام يوم ولما توصل (وفى وجود أبوها وتحت إشرافه) تدخل غرفة النوم معاها، وتمارس معاها ما يمارسه الأزواج، وبعدين لو حبيت تستنى للعشاء ما فيش مانع أو لو حبيت تمشى بسرعة عشان تلحق تتعشى مع مراتك وولادك، ده شئ يرجع لك.
- طيب وده كله فى مقابل إيه؟
- فى مقابل إنك تصرف على الزوجة مصاريفها الشخصية بالكامل إلى جانب مصروف إيد يوميا يتم الإتفاق عليه، وبعدين كل لما تزوها ليلة تديها إللى فيه النصيب.
- طيب أنا عندى إستفسار بس محرج شوية.
- إتفضل
- وإيه الفرق بين أنواع الزواج ده وبين لا مؤاخذة الدعارة؟
- لا يإستاذ: دى زيجات موثقة بالشهود وبموافقة الأهل، وعلى سنة الله ورسوله، وفيه شهادة زواج زيها زى أى زواج آخر، وبعدين دى زيجات حللها الشرع، وعندى فتاوى من كبار علماء المسلمين ممكن أبعثها لك بالإيميل على ملف (بى دى إف)
- طيب ولو الزواج أنتج أولاد، يكون إيه العمل؟
- عادة الزيجات دى بتكون مؤقتة ولا ينتج عنها أولاد، وطبعا هناك موانع الحمل المعروفة إللى حضرتك ممكن تستخدمها، وشركتنا غير مسئولة عن أى أطفال تنتج بسبب الزواج ده، وده حيكون بند من بنود التعاقد معاك لو حصل نصيب.
- طيب وإنت بذمتك لو عندك بنت كنت ترضى تجوزها بالطريقة دى؟
- طبعا أنا عندى عقبال عندك بنتى (سناء) لغاية دلوقتى إتجوزت سبع مرات زواج مسيار واربع مرات زواج على أبوها، ولسه ما كملتش خمسة وعشرين، وبتكسب كويس قوى من الموضوع ده وبتقدر تصرف على نفسها وساعات بأستلف منها.
- يانهار أبيض إتجوزت حداشر مرة وعندها خمسة وعشرين سنة؟
- آه ما الجوازة من دول ما تكملش شهرين وإقلب.
- وياترى عمرها إتجوزت إكثر من واحد فى نفس الوقت؟
- إيه إللى بتقوله ده ياإستاذ، إحنا ناس نعرف ربنا ونعرف الشرع، بنتى عمرها ما إتجوزت أكثر من راجل واحد فى نفس الوقت
- وياترى إيه أقصر وأطول جوازة معاها؟
- فيه واحد إتجوز وطلق فى نفس الليلة، وده كان رقم قياسى، وأعطاها خاتم ألماظ للخطوبة ومهر خمسة آلاف دولار، وبعد كده رمى عليها يمين الطلاق، بعد كده ما شفناش وشه
- طيب وده ممكن يرجع تانى
- آه ساعات بيرجعوا ويردوها على ذمتهم
- طيب وأطول جوازة؟
- فى واحد بقى خلاها على ذمته أكثر من ست شهور.
- ياه ده عصلج معاها قوى
- آه ولقيناه إنه حيوقف حال البنت، وبعدين كان بخيل جدا، بس إحنا رضينا بيه عشان حالة سوق الزواج كانت نايمة شوية
- طيب وده عملتم معاه إيه ده؟
- أنا فكرت إننا نرفع عليه قضية خلع، لكن ما لقيتش عندنا مبررات قانونية وبعدين المحامين حياخدوا الشئ الفلانى والعملية حتوقف علينا بالخسارة، لكن بنتى الله يجازيها عملت فيه حتة عملة.
- خير عملت إيه
- بقى كل ما ييجى بالليل يتعشى تحط له شربة ملح إنجليزى فى الأكل، وبقى كل ليلة ييجى له إسهال لما يروح لمراته، وفى الآخر قال لها:"إنت أكلك بيجيب لى إسهال ونفسى إتسدت عنك روحى وإنت طالق"، وإحنا طبعا ما صدقناش، ويومها عملنا فرح وجبنا رقاصة فى البيت
- طيب أنا فهمت الحدوتة، دلوقت أنا أفضل زواج المسيار، ياترى عندك إيه؟
- أنا عندى قاعدة بيانات (داتا بيس) كبيرة جدا إنت قوللى نفسك فى إيه وأنا جاهز، عندى الشقراء والسمرا والسودة وعندى من أول 18 سنة لغاية خمسين سنة وفيه العربية والفليبينية والباكستانية، قول لى تؤمر بإيه
- خلينا نغير شوية، ناخد واحدة شقراء، وخلينا مع بنات العرب، والسن فى حدود الثلاثين.
- دقيقة واحدة خليك معايا لما أبص على الكومبيوتر..... آه فيه عندى واحدة هايلة شقراء عندها تسعة وعشرين سنة وممكن تبقى فاضية بعد أسبوعين لأن عندها جوازة لقطة ضرورى تخلص منها، إلا لو كنت مستعجل عندى واحدة جاهزة الليلة
- لأ أنا مش مستعجل، طيب ممكن أشوف صورتها
- آه طبعا بس فيه مصاريف للمكتب عشان نبعت لك الصورة بالإيميل
- وكام ياترى؟
- خمسين دولار بس
- ماشى ياسيدى، طيب بخصوص عقد الزواج والمأذون والشهود؟
- إحنا مرتبين كل حاجة، عندنا مأذون وشهود موجودين 24 ساعة 7 أيام فى الأسبوع، ومصاريف كلام فاضى.
- طيب ومصاريف مكتبكم؟
- إحنا عندنا أكثر من طريقة للدفع، الطريقة الأولى إنت تدفع مبلغ مقطوع مرة واحدة، أو تدفع بالليلة، إيه رأيك؟
- أنا شايف إنى أدفع مبلغ مقطوع
- مبروك مقدما ياإستاذ سامى، ونتمنى لك جوازة سعيدة، وأرجو تتصل بينا لو فيه أى مشكلة مع العروسة، إحنا بندى ضمان تسعين يوم، أو ثلاثين ليلة زواج أيهما أسرع.
- متشكر قوى ياسيد "قرنى"
samybehiri@aol.com