ملكة جمال مصر السابقة تطمئن جمهورها

&

القاهرة: طمأنت الفنانة وملكة جمال مصر السابقة إنجي عبد الله جمهورها عبر فيسبوك أمس عن تطورات حالتها الصحية بعدما أعلنت في وقت سابق اصابتها بورم في المخ.

وقالت أن الأطباء في اليابان أخبروها وبعد فحوصات عدة انها في حالة صحية جيدة وان حجم الورم لم يتغير منذ اكتشافه قبل شهرين، موجهة الشكر لجمهورها وأصدقائها الذين دعوا لها بالشفاء العاجل.

وكتبت انجي عبر صفحتها على فيسبوك قائلة: " أنا الحمد لله كويسه ومبسوطة اوى علشان عرفت ان الورم الحمد لله مش خبيث، انا عملت فحوصات كتير هنا في اليابان، واللي اتأكدت منه دلوقتى انو مش خبيث لان حجم الورم متغيرش من شهرين، وفي إحتمالات تانيه كتير ،انه يكون فيروس او انفكشن ، بس هعرف النتيجه النهائيه كمان اسبوع، انا دخلت المستشفى لمده اسبوع عملت فحوصات كتير على المخ، وعينه من النخاع الشوكى ،والله العظيم كل الدكاتره اللي متابعين حالتي هنا مذهولين ، في الاشعات باين حجم ورم وكبير في مكان خطر هو جزع المخ اللي ميقدروش يخدوا عينه منه لانه في مكان خطر ، بس انا معنديش اي اعراض خارجيه غير لما أمشي لمدة طويلة بفقد الاحساس برجلي وا حيانا بشوف كل حاجه قدامي اتنين، وهما مش عارفين ازاى ده ممكن يحصل، وفعلا شايفني حاله غريبه ،لان الاعراض اللي عندي حاجه بسيطه قدام الاشعات اللي شايفنها".

وآضافت "بس هقول الحمد لله ان الدعا اللي اتدعالي من كل الناس اللى حواليا اهلي واصحابي مسلمين ومسحيين وحتى بوذيين هنا من اصحابي في اليابان ، والحب و الخوف اللي شفته من الناس عليا وحتي جوزي اللي ربنا اكرمني بيه ووقف جمبي وكان بيراسل اكبر مستشفيات في لندن و امريكا لحد الفجر هنا علشان فرق التوقيت بينا".

واستطردت "حسيت انا اد ايه محظوظه ومكنش فارق معايا ايه ممكن يحصلي كفايه اني شفت الحب ده من كل اللي حواليا، وساعتها كنت بفكر انوا خلاص كلها شويه وقت مش اكتر، بس كنت سعيده و عمري حتى ما عيطت مره ، قلت كلنا لينا وقت وانا ممكن وقتي جه، بس كفايه اني كنت محظوظه وشفت حب الناس واد ايه دي نعمه، بس الحمد لله ان كويسه وفى امل كبير اوى دلوقتى انها تطلع حاجه ممكن تتعالج، انا فعلا بشكر كل اللي حواليا وحاسه ان كل الدعا اللي اتدعالى فرق كتير وعندي ايمان ان ممكن يكون غير من حاجه وحشه كانت هتحصلي، بجد شكرا من قلبي وربنا يحميكوا لاهلكو وكل الناس اللي بيحبوكوا وبتحبوهم .شكرا".

&

&