"إيلاف" من القاهرة: أوضج المخرج خالد دياب أن حمل الفنانة مي كساب في ابنتها الوحيدة كان سبب حذف مشاهد لها بفيلم "طلق صناعي". وكتب عبر صفحته على "فيسبوك" بعد ساعات من استقبال الصالات السينمائية للفيلم قائلاً: "مي كساب ما بتعرفش تمثل ... عندي التمثيل أن الممثل ما يمثلش.. أنه يبقي طبيعي وهي دي مي كساب طبيعية ما بتمثلش (طبيعية ما بتعرفش تمثل)، مي دورها كان كبير جداً في طلق صناعي يليق بقيمتها ونجوميتها لكن دخل علينا موسم رمضان والممثلين دخلو مسلسلات فإتأجل تصوير الفيلم ومي كانت حامل فصورت مشاهد ليها وهي حامل في الشهر التاني ومشاهد وهي في السادس ومشاهد في التاسع -ربنا يخلي بنتها".

وأضاف "فنتيجه لما يسمي الراكور اللعين واجهنا مشاكل .. انا كنت شايف أدائها هايغطي علي الراكور بس كان في مشاهد واضح فيها جداً اختلاف الشكل فشيلت من مشاهدها و انا بجد بتقتطع، وانا بتفرج علي الفيلم وسط الجمهور في مصر و دبي كل ما مي تتكلم الناس تضحك فانا أقول لواحد من صنّاع الفيلم هو مكانش ينفع اسيبلها مشهد او اتنين كمان ! يقولي الراكور يا استاذ... فعلا انا و الناس كان نفسنا مي تبقي اكتر في الفيلم بس عزائي الوحيد ان كل مشهد لمي في الفيلم الناس بتموت من الضحك خصوصا البنات والستات معرفش ليه!".
واختتم حديثه قائلاً "مي قلبها أبيض بجد ما زعلتش و ساندت الفيلم لغاية آخر دقيقة وجت العرض الخاص هي وجوزها أوكا الي سعيد انه جه، مي بجد أنا اتشرف اني اشتغلت معاكي و أحب جدا نشتغل مع بعض تاني".