إيلاف من بيروت: أعلن الفنان ربيع الجميّل، من خلال بيان أطلقه عبر صفحاته الرسمية على مواقع التواصل الإجتماعي، توقفه عن الغناء في الملاهي الليلية نهائياً، حيث فاجأ جمهوره بقراره المصيري ووعدهم بالاستمرار بتقديم الأعمال الأجمل والأفضل، كما تقدم بالشكر إلى كل من وقف إلى جانبه ودعمه ولا يزال.

يُذكر أنه يستعد للسفر إلى الولايات المتحدة الأميركية، كندا، أوستراليا وأوروبا، حيث سيقوم بجولاتٍ فنية يُحيي خلالها مجموعةً كبيرة من الحفلات، ويلتقي جمهوره المغترب، فيما يضع اللمسات الأخيرة على ألبومه الجديد.

فيما يلي نص البيان كما نشره "الجميّل": 

"حبايب قلبي ،
ينعاد عليكم جميعاً هالعيد الغالي عليي كتير والسيدة اللي مباركتلي حياتي كلا دخيل اسما، بهالمناسبة حبيت شارككم بقرار مصيري اخدته بعد تفكير طويل وبعد مشاورات مع إدارة أعمالي ومع الشركة الغالية المنتجة لألبومي المقبل بإذن الله X-Ray Production.
أنا بفضل الله وفضلكم ومحبتكم ودعمكم جميعاً وصلت لكل نجاحاتي اليوم وهالنجاحات متل ما أنا فخور وسعيد فيها كمان الها ضريبة بالمقابل، هالضريبة هيي التعب والمجهود الهائل اللي عم بضطر قدمه مؤخراً حتى إقدر لبّيكم بكافة الحفلات والمهرجانات والأعراس اللي عم تختاروا إنتو ربيع تايحييها، ومتل ما الكل بيعرف في جزء كبير منكم معوّد يحضرني تلات سهرات أسبوعياً بـ" موسيقار نايت كلوب" هالمكان العزيز كتير على قلبي ويللي إلي فيه ذكريات ونجاحات ما بتنتسى ويللي بصمت فيه أنا وإدارته الكريمة وكامل فريق عمله الغاليين بصمة لامعة جداً بعالم السهر بلبنان، اليوم أنا وبكل أسف مش قادر كمّل معكم بموسيقار ولا حتى بأيا نايت كلوب آخر نظراً لضخامة مسؤولياتي الجديدة من تحضير ألبومي اللي مفروض يصدر قريباً عن X-Ray Production إلى ارتباطاتي الكثيفة بين لبنان والدول العربية وجولات سفر بالخارج ، كرمال هيك قراري اليوم إني إتفرّغ فقط لحفلاتي العامة وإطلالاتي المصوّرة وإصداراتي الغنائية ...
بشكر محبتكم ودعمكم الدائم لربيع الجميّل اللي إنتو عملتوه ، بشكر كل شخص تابعني وسهر عندي بموسيقار يوماً ما ، بشكر إدارة هالمكان الغالي ، بشكر كل موظفينه بكافة مسؤولياتهم ، وأكيد بتمنى تعذروني إذا سبق وصدر مني أيا شي ضايقكم إخواتي بيكون بفعل التعب الفني اليومي وقلة النوم ...
بحبكم من نص قلبي
#ربيع_الجميّـل"