إنزعجت بشدة عندما علمت أن هناك أسماك قرش فى شرم الشيخ قد هاجمت بعض السياح الأوروبيين فى شرم الشيخ، وكان من نتيجة هذا الهجوم هو وفاة سائحة ألمانية وإصابة أربعة، وسبب إنزعاجى هو أن السياحة هى أكبر أمل لمصر فى تحقيق النمو الإقتصادى، وشرم الشيخ بالذات أخذت موقعا متميزا على خريطة العالم السياحية، والسياحة فى مصر توظف ملايين الشباب.

وقد إنزعجت أكثر عند قراءة تصريحا للسيد اللواء محمد عبد الفضيل شوشة محافظ جنوب سيناء قال فيه:quot; أن مايتردد بشأن إلقاء الموساد سمكة القرش القاتلة لضرب السياحة فى مصر أمر غير مستبعد ويحتاج لوقت للتأكدquot;. ولمساعدة سيادة اللواء شوشة على التأكد من هذا الموضوع الهام، قررت التوجه مباشرة لمقابلة اللواء مائير داجان رئيس جهاز الموساد الإسرائيلى بعد أن أخذت موعدا معه عبر موقع الموساد الإلكترونى
اضغط هنا

رئيس جهاز الموساد اللواء داجان
وحدث بالفعل أن تم تدبير لقاء معه فى مكان ما بصحراء النقب بعد أن أخذنى بعض الجنود معصوب العينين متوجها من شرم الشيخ إلى طابا ومنها إلى إيلات ثم بعد ذلك إلى هذا المكان المجهول فى الصحراء، وبعد أن تم فك العصابة من على عينى وجدتنى وجها لوجه مع اللواء داجان الذى صافحنى ودار بيننا الحوار التالى:
- أهلا بيك فى إسرائيل
- أهلا، بس لو سمحت عاوز كباية مية وسندويتش فول لأنى على لحم بطنى من ساعة ما الجماعة بتوعك أخدونى من شرم الشيخ
(وأمر اللواء داجان بزجاجة مياه معدنية وسندويتش فول كاليفورنيا، وتعجبت لوجود سنتدويتش فول فى هذا المكان)
- إحنا بنقرا كل مقالاتك مسيو بحيرى وبنحللها فى مركز الدراسات الإسترتيجية وكمان تعليق قراءك.
(وشعرت بنوع من الفخر والقلق فى نفس الوقت... أنا مقالاتى أصبحت محل دراسات إسترتيجية فى الموساد: quot;تيجى فكيهة تتفرجquot;)
- لكن مقالاتى تهمكم فى إيه؟ ده أنا بأكتبها فى الإنترنت على سبيل التسلية
- إزاى مسيو بحيرى الإنترنت هو المستقبل، وكلامك بيعبر عن قطاع فى العالم العربى نحب ندرسه ومنه نعرف إتجاهات المستقبل.
- أنا الحقيقة جاى لك النهاردة عشان اللواء شوشة محافظ جنوب سيناء أبدى شكوك بأن أسماك القرش المفترسة فى شرم الشيخ قد تكون من عمل الموساد، وأنه يلزمه وقت وقت للتحقق من هذا؟
- طبعا أنا ومسيو شوشة لواءات زى بعض وأنا أحترم رأيه، لكنى مش حاأقدر أفيدك فى الموضوع ده.
- طيب مين يقدر يفيدنى؟
- أنا حا أحولك إلى الكولونيل:quot;ليفى أشكولquot; مسئول قطاع الأسماك المفترسة فى الموساد
(وسلمت عليه بعد إنتهائى من إلتهام سندويتش الفول)
- متشكر قوى سيادة اللواء داجان.
(وأخذنتى ضابطة بملابس مدنية، ومرة أخرى وضعت العصابة حول عينى بحنان شديد، وركبنا سيارة يبدو أنها جيب سارت بنا نحو ساعتين أو يزيد وأخذونى إلى داخل مبنى وسرنا بضع خطوات وأجلسونى على كرسى، وبعد حوالى ربع ساعة، حضر شخص ورفع العصابة عن عينى، ووضعت يدى على عينى أحاول منع دخول الضوء الشديد إلى عينى بعد ظلام دامس إستمر أكثر من ساعتين)
- أهلا باشمهندس بحيرى (قالها شخص بلهجة مصرية صميمة) أنا العقيد ليفى أشكول رئيس قطاع الأسماك المفترسة فى الموساد
(ونظرت إلى أعلى فوجدت شابا وسيما يقف فوق رأسى له ملامح شرقية فى أوائل الثلاثينات من عمره كما يبدو من شكله)
- كان فيه رئيس وزراء إسرائيلى فى الستينيات إسمه زى إسمك بالضبط (ليفى أشكول)، ياترى يقرب لك
- آه هو كان جد مراة عمة إخو خالتى (راحيل ديمونة)، وهم أعطونى أسمه لأن خالتى (راحيل) كانت معجبة بيه جدا وبتحبه
- لكن تعالى هنا، إنت تعرف منين إنى باشمهندس؟
- إحنا نعرف كل حاجة عنك
- معقول؟؟
- كان إستحالة نوافق على مقابلتك للواء داجان بدون إننا نعرف كل حاجة عنك، وإحب أقولك إننا نعرف عنك حاجات إنت ما تعرفهاش عن نفسك.
(فسألت بخليط من حب الإستطلاع على الإستهبال)
- بجد تعرفوا حاجات زى إيه؟
- يعنى مثلا إحنا نعرف إسم الداية إللى ولدتك فى بيتكم فى مصر القديمة بالقاهرة يوم تسعة مايو!!
- طيب كان إسمها إيه؟
- كان إسمها أم حسن، وإبنها الكبير حسن كان فاتح مطعم فول وطعمية فى شارع حسن الأنور فى مصر القديمة، وبنتها الكبيرة فوزية إتجوزت إبن عمها وإتطلقت بعد ما خلفت منه بنت إسمها زنوبة!! تحب تعرف إيه كمان؟
- ياولاد الإيه.. أنا أول مرة أعرف إن أم حسن كانت هى الداية إللى ولدتنى.. هى فعلا كانت جارتنا فى مصر القديمة.
- أى خدمة ياباشمهندس؟
- أنا الحقيقة قابلت سيادة اللواء داجان، عشان أسأله عن علاقة الموساد بموضوع أسماك القرس المفترسة فى شرم الشيخ، لأن فيه إتهامات فى أجهزة الإعلام المصرية والعربية تتحدث عن هذا الموضوع وأنا فى الحقيقة مش مصدق لأننى ضد نظرية المؤامرة على طول الخط، والناس عندنا بتستسهل أى مشكلة تحصل يلبسوها للموساد، حتى أصبح هذا الموساد بعبع كبير فى العالم العربى
- إحنا فعلا بعبع كبير أكبر مما تتصور، وتحب تعرف إيه عن موضوع سمك القرس المفترس؟
- أولا أحب أسألك، مع كل إحترامى لوظيفتك، هل معقول جهاز مخابرات كبير زى الموساد عنده قسم مخصوص للأسماك المفترسة؟
- طبعا ناس كثير حتستغرب زيك، أنا حتى خطيبتى (ألينا) عمرى ما قلت لها عن طبيعة شغلى لأنها مش حتصدق، بس أحب أقولك إن قسم الأسماك المفترسة فى الموساد من أهم وأخطر الأقسام عندنا.
- إزاى إشرح لى؟
- إحنا بنستخدم الأسماك للتجسس على كل الملاحة البحرية فى البحر المتوسط والبحر الأحمر وقناة السويس، عندنا أسماك الدولفين بندربها ونضع فى رؤوسها كاميرات إلكترونية مزودة بوسائل إرسال إلكترونية وهى تصور فوق الماء وتحت الماء لتعطينا تحركات الاساطيل العربية وغير العربية فى البحار على مدار الساعة، وأخيرا بدأنا فى تدريبها على التعامل مع قراصنة الصومال، حتى إنك تلاحظ إن قراصنة الصومال عمرهم ما قدروا يخطفوا سفينة إسرائيلية.
- وياترى ليكم نشاط فى الخليج العربى
- قصدك الخليج الفارسى، طبعا إحنا لينا نشاط كبير هناك، بس ما أقدرش أكلمك عنه نظرا لحساسية الوضع مع إيران فى الوقت الحالى
- نيجى بقى للموضوع إللى أنا جاى علشانه، وهو موضوع سمك القرش فى شرم الشيخ.
- إنت عاوز الحق ولا إبن عمه؟
- إدينى الأول إبن عمه وبعد كده قل لى الحق
- إحنا ما لناش أى علاقة بموضوع القرش المفترس فى شرم الشيخ، ودى إتهامات مضحكة، ده إبن عمه.
- طيب والحقيقة بقى
- الحقيقة إن دى عملية من أهم عمليات الموساد منذ عملية إنقاذ الرهائن الإسرائليين فى عنتيبى
- طيب إيه أهمية العملية دى، وليه الأذية دى بس ياليفى؟
- إحنا متغاظين جدا من نمو السياحة فى شرم الشيخ، ولعلمك شرم الشيخ دى كانت ولا حاجة ايام ما كانت مع المصريين قبل 67، إحنا إللى عملنا شرم الشيخ حتى أصبحت من أهم المناطق السياحية فى العالم.
- وده يضايقكم فى إيه؟
- إنت مش عارف إن شرم الشيخ أخذت السياح الإسرائييلين والأوربيين من إيلات والبحر الميت والجليل الأعلى وغيرها من المناطق السياحية فى إسرائيل، بالذمة دى مش حاجة تغيظ؟
- لأ... عداك العيب يا ليفى، طيب إزاى عملتم الحكاية دى.
- إحنا عندنا هنا فى المكان ده مركز تدريب للأسماك المفترسة مثل أسماك القرش، وأسماك التجسس مثل اسماك الدولفين، وأسماك القرش إحنا أخدناها فى فجر يوم 25 نوفمبر الماضى فى أحواض كبيرة ونزلناها بالقرب من منطقة خليج نعمة فى شرم الشيخ بعد تدريبها على مهاجمة السياح.
- طيب مش حرام عليكم الست الألمانية إللى القرش أكلها دى؟
- ده أهم سبب للعملية دى... لعلمك السيدة الألمانية ريتا ساكري (70 سنة) أبوها (هانز ساكرى) كان من النازيين المتورطين فى مذابح اليهود الهولوكست فى بولندا بين 1941 و 1943 وكنا بقالنا سنين بنحاول نتخلص منه وما قدرناش نعتر عليه خالص
- طيب وذنبها إيه بنته ريتا؟
- ذنبها إنه كان ابوها، وإحنا بينى وبينك بقى عمرنا ما ننسى للألمان إللى عملوه فى اليهود أيام هتلر، معظم الشعب الألمانى كان مبسوط ولم يتحرك أحد من الألمان للإعتراض على مذابح الهولوكست وإللى كانت معروفة لكل الشعب الألمانى.
- طيب إزاى أصدق كلامك؟
- أكبر دليل إننا دربنا إسماك القرش على عدم مهاجمة أى واحد من السياح الإسرائيليين
- طيب ما كنتوش خايفين على الرئيس مبارك من سمك القرش، لأنه بيقضى وقت كبير فى شرم لاشيخ، لأن لو كان أصابه مكروه بسبب سمك القرش وثبت تورطكم، كان ممكن ترجع الحروب تانى بين مصر وإسرائيل
- أولا الرئيس مبارك بيفضل يعوم فى حمام السباحة، وكمان إحنا عارفين المكان إللى بيسبح فيه فى البحر وحاطين حول المكان حماية إلكترونية من سمك القرش.
- إحنا بنسمع إن الموساد مسئول كثير عن المصائيب إللى بتحصل فى مصر، ياترى الكلام ده صحيح؟
- طبعا فى حاجات إحنا مسئوليين عنها، ولكن معظم المصايب إللى عندكو، إنتوا مسئولين عنها ولكن ما عندناش مانع ننسبها للموساد عشان شعبكم يبقى خايف دايما من إسرائيل ومن الموساد، يعنى من ضمن الحاجات إللى إحنا مسئولين عنها: إرتفاع اسعار الطماطم واللحوم فى الفترة الأخيرة فى مصر، وإحنا مسئولين عن عدم تأهل مصر لكأس العالم 2010، وكمان إحنا مسئولين عن تدهور أداء النادى الأهلى المصرى فى الفترة الأخيرة، كما إننا مسئولين وينشجع إنتشار النقاب فى مصر!!
[email protected]