إخص عليك ياسى سمير: إنت مش عارفنى ولا إيه؟!!

قضيت أجازة الصيف الماضى فى مصر، وفى خلال الزيارة سافرت إلى الإسماعيلية للقاء صديق إلكترونى (تعرفنا من خلال الإنترنت) وقد تحول بعد اللقاء إلى صديق من دم ولحم وعظم!! وعرفنى بصديق إلكترونى آخر، وذهبنا لتناول quot;غدوةquot; سمك مقلى بالرز المفلفل بالجمبرى على مطعم يطل على قناة السويس، ودار الحديث كما يدور دائما حول المشاكل وتفاقمها وتراكمها تراكم نوعى وعددى بطريقة تبعث على اليأس من أى حلول، وشر البلية ما يضحك، لذلك برع المصريون فى السخرية من بلاويهم وذلك لأنها تصل دائما إلى درجة quot;شر البليةquot;، وحكى لنا صديقى الإلكترونى quot;سميرquot; تلك الحكاية العجيبة:
منذ إسبوعين سمع سمير جرس باب بيته وعندما فتح الباب، وجد (فيما يبدو) سيدة ترتدى النقاب (لأنك لا تعرف ما هو تحت النقاب، وهو ليس بالضرورة سيدة).
وقالت وهى تصوب عينيها من تحت النقاب فى إتجاه عينيه:
- سلامو عليكو يا إستاذ سمير.
- سلامو عليكو... أى خدمة؟
ثم مدت يدها ذات القفاز الأسود محاولة أن تسلم عليه، فإعتذر عن السلام، لأنه خشى أن يكون تحت القناع مجرما وخاصة أنه لاحظ أن اليد أضخم قليلا من أن تكون يد حريمى ولم يتأكد أن الصوت كان حقا صوتا نسائيا:
- معلهش ياست أنا ما با أسلمش على ستات، أصلى لسه متوضى، أى خدمة عشان عاوز أروح أكمل الصلاة.
(وتأسف على فلتة اللسان والتى توحى بأنه يعيش وحيدا فى البيت، وخاصة أنه سمع عن جرائم ترتكب تحت النقاب).
- إخص عليك ياسى سمير، إنت مش عارفنى ولا إيه، تهون عليك العشرة يا سى سمير؟
(وفشل أن يتذكر صاحبة الصوت، كما فشل أن يتذكر صاحبة العينين)
- لا مؤاخذة ياستى إنتى مين، وعاوزة مين بالظبط؟
- مش حضرتك الإستاذ سمير الشلشمونى؟
- أنا أيوه أنا ياستى، وأسمى كمان مكتوب ع الباب، يعنى ما جبتيش حاجة من عندك، خلصينا الله يخليكى.
- ما كانش العشم تهون عليك عشرة السنين إللى فاتت، طيب قوللى إتفضللى، إعزم بكباية مية ساقعة فى الحر ده.
- ياستى ما كانش يتعز، أنا راجل متجوز ومراتى مسافرة هى والأولاد وأنا حأحصلهم يوم الجمعة على الإسكندرية.
- ده أنا با أطلب كباية مية، والمية ما تفوتش ع العطشان.
- ياستى بس أعرف إنتى مين الأول
- ياخاين تهون عليك الأيام الحلوة، أيام الشقاوة، فاكر quot;زيزىquot; بتاعة جنينة الأورمان، quot;زيزىquot;... فاكر أيام القناطر الخيرية!!
(وتذكر أخيرا، لقد مر ما يقرب من ربع قرن على أيام الشقاوة فى نهاية أيام الجامعة، كان له مغامرات ومغامرات مع فتاة تدعى quot;زيزىquot;، ولم يكن يتخيل أن زيزى التى كانت توقف الجامعة على رجل قد تحولت بقدرة قادر إلى هذا الشئ الأسود الغير محدد المعالم)
- الله يخرب بيتك ياquot;زيزىquot;، وإيه إللى عمل فيكى كده، تعالى خشى.
(دخلت quot;زيزىquot;، وجلست على كرسى فى صالة المدخل)
(وتردد سمير أن يطلب منها أن تكشف النقاب، وقبل أن يقرر قامت هى بكشف النقاب، وخلعت غطاء الرأس، كما خلعت العباءة السوداء، والقفاز الأسود، وفوجئ بفستان آخر موضة تحت كل هذا السواد، ولكنه لاحظ أن quot;زيزىquot; بتاعة زمان قد تضاعفت، ويبدو أنه من تأثير إرتفاع معدلات التضخم فى كل شئ).
- إيه إللى عمل فيك كده يابت يازيزى، فين زيزى بتاع زمان؟
- ما تبص لنفسك ياخويا، هو ده برضه سمير بتاع زمان، إنت كان عمرك عندك كرش بالشكل ده.
- أنا مش قصدى على التضخم، التضخم يبدو أثر علينا و على كل حاجة، أنا قصدى الحاجات إللى إنتى لابساها دى.
- جوزى الله يخرب بيته مطرح ماهو راح.
- الله يخرب بيتك هو إنتى متجوزة، وجاية هنا برجليكى.
- أنا بقى ياحبيبى متجوزة، ومش متجوزة.
(وحكت له حكاية طويلة عن جوازها من شاب كان يبدو عاديا قبل الزواج ثم طق مخه فجأة وأطلق لحيته ولبس الزى الأفغانى واجبرها على لبس الحجاب أولا ثم الخمار وأخيرا النقاب، ولم ينجبوا أطفالا، ورفض الذهاب للأطباء لعلاج العقم، وقال لها إن دى حاجة بتاعة ربنا، ثم فجأة طفش وسافر إلى العراق من ثلاث سنوات بحجة أن يعمل بتدريس اللغة العربية، ولم تسمع مباشرة أى شئ، ولكنها عرفت فيما بعد أنه ربما إنضم إلى تنظيم القاعدة، وأن مباحث أمن الدولة فى مصر قد إستدعتها أكثر من مرة للسؤال عنه، ولم يصدقوها عندما قالت لهم فى كل مرة أنها لا تعرف عنه أى شئ، ورفعت قضية تطلب الطلاق منه وعلى وشك أن تكسبها).
- طيب وعايشة إزاى؟
- انا با أشتغل موظفة ورحت سكنت مع أهلى.
- وإنتى إيه إللى جابك الإسماعيلية.
- أنا سألتك عليك لغاية ماعرفت فين شغللك، وهناك ولاد الحلال قالوا لى إنك طلقت مراتك، وعرفت عنوانك، وجيت عشان أشوفك.
- بس إنتى جريئة قوى، مش خايفة حد يشوفك.
- حتى لو حد شافنى، معقو ل حد يشك فى واحدة منقبة.
- الله يخرب عقلك، ده إنتى حتفضحينى فى العمارة.
- ولا فضيحة ولا حاجة، أنا قلت للبواب إنى طالعة لخالى الإستاذ سمير الشلشمونى!!
.........
وبعد أن أكمل لنا سمير الإلكترونى الحكاية أخذ يعدد لنا مزايا النقاب!!

[email protected]